العرافه للكاتب محمود الامين
يقال ان اصل السحر بدأ من الغجر... قبائل الغجر كانت تمارس السحر بكافه انواعه وخصوصا السحر الاسود.... وهذا عن طريق عرافه موجودة فى قبائلهم تدعي المعرفه ولكن من يتبعها يكون مصيره الهلاك
هكتب كل حاجه انا خلاص عارف اني هموت ده مصيري وانا مسلم بيه واستاهل لاني مشيت ورا كفر ودجل.... خلصت الي بكتبه وحسيت بنفس في ضهري اتلفت ورايا وكانت الصدمه
انا اسمي عمرو عبد الستار عندي٣٧ سنه عايش في القاهرة رغم اني من احدي محافظات الصعيد... وده بيرجع لظروف شغلي انا بشتغل تاجر في السوق وليا اسمي... متزوج من وفاء من 3 سنين... ابويا وامي عايشين في قريه من قري الصعيد وبنزورهم من الحين للاخر... الحمدلله الظروف الماديه كويسه جدا.... الحياه مستقره بشكل كبير لكن المشكله الوحيده اني انا ووفاء مخلفناش... انا كنت راضي ومسلم بقضاء الله.. لكن وفاء لا لفينا علي دكاتره كتير والاجابه واحده مفيش حاجه تمنع الانجاب بس لسه ربنا مأذنش.... حاولت كتير اقنعها انه خلاص مفيش منه فايده اننا نروح لدكاتره لكنها كانت بتصر كل مره علي تغيير الدكتور..... لحد ما في يوم اتصل بيا ابويا الحج
عبد الستار... الو ازيك يا حج اي الاخبار.... الحمدلله على كل حال يبني... امك تعبانه شويه وطالبه تشوفك.... امي مالها يا بابا.... متخفش يبني تعالي بس هي نفسها تشوفك... حاضر انا جاي النهارده.... كلمت مراتي وقولتلها اننا هنروح نزور اهلي النهارده..... جهزنا نفسنا وركبنا القطر سكه سفر طويله وصلنا البلد علي فجر اليوم التاني.... وصلنا البيت واستقبلنا بابا وقال حمد لله على السلامة يبني.... فين امي وعامله اي دلوقتي....
امك بخير يبني وصحتها اتحسنت عن امبارح.... دخلت الاوضه بتاعتها وبوست ايديها وانا بقولها الف سلامه عليكي يا امي.... قلتلي اي يا عمرو الغيبه الطويلة دي.... معلش يا امي انتي عارفه الشغل.... ودخلت مراتي سلمت علي امي سلامتك يا حماتي... ردت عليها امي الله يسلمك يا بنتي متغبوش تانى.... في اللحظة دي سمعت صوت زغاريط جاي من البيت الي جمبنا.... سألت امي هو في فرح جمبكم ولا اي... ردت عليا امي لا يبني دي مروه بنت الحج حسين حامل ومن امبارح والزغاريط شغاله عندهم.... اصلها يبني قعدت عشر سنين من غير خلفه لحد لما راحت للست حوريه العرافه ومشكلتها اتحلت وخلفت..... رد عليها بابا وقال كفايه تخلف بقا مفيش الكلام ده الي حصل ده من تدبير ربنا كل شئ بأوانه....
ردت ماما انا مقولتش حاجه بس الست دي الكل بيشكر فيها وبيقول ان عندها كرامات.... ادخلت انا في الوقت ده وقولت ده كلام فارغ وانا رأيي من رأي بابا....سيبكم دلوقتي من الكلام ده احنا جايين من سفر ومحتاجين ننام ونرتاح...... دخلنا اوضه في البيت ولاحظت ان وفاء سرحانه.... مالك في اي.... مفيش حاجه بس بفكر اروح لحوريه العرافه..... انتي اتجننتي صح انتي ازاي تفكري كده احنا ناس متعلمين ومؤمنين بربنا.... قلتلي نجرب مش هنخسر حاجه.... وفضلت تزن عليا عشان اوافق وزي ما بيقولوا الزن علي الودان امر من السحر... وافقت وقولتلها بس انا مش مطمن للمشوار ده....
طلبت مني طلب غريب قلتلي انها عاوزه تزور مروه جاره امي.... سألتها ليه... قلتلي لما أرجع هفهمك..... سبتها تروح فعلا ولما رجعت قلتلي... الست دي من اصول مغربيه وجات البلد قريب ووقفت مع ناس كتير انا عرفت بيتها ونقدر نروحلها كمان شويه.... قولتلها ماشي ربنا يسهل... بعد حوالي ساعتين قولت لوالدي اني رايح ازور المقابر واقري الفاتحه لجدي.... كان لازم اقول كده عشان مش هعرف اقول الحقيقه.... اتحركنا وعلي وصف وفاء للطريق وسؤال الناس وصلنا كان بيت معزول شويه عن بيوت القريه ليه بوابه سوده وعلي البوابه قرون اشبه بقرون الجدي.... بيت مقبض جداً.......
خبطنا مره واتنين لكن الباب كان موارب دخلنا ممر طويل وعلي يمينا وشمالنا كراسي.... واوضه في اخر الممر.. خرجت منها واحده وقالت نعم عاوزين اي.... قولتلها عاوزين الست حوريه..ردت اتفضلوا ادخلوا الاوضه دي.... كنت متوقع هلاقي بخور وجو الدجالين لكن لما دخلنا الاوضه كانت مفروشه حصير وقاعده علي الحصير ست شكلها غجريه لما تبص لملامحها تحس انك تايه وكان قدامها طبق فيه رمل وحجاره.... وقالت ازيك ياعمرو.... ازيك يا وفاء.... ردت عليها انتي تعرفينا منين.... ابتسمت وقالت انا اعرف كل حاجه مش
انتوا جايين عشان موضوع الخلفه... ما اهو
٣سنين كتير يا وفاء..... احنا كنا واقفين مش عارفين ننطق..... قالت اقعدوا قدامي هنا... امسكي الحجر ده وشوشي الحجر ده بالي ياجي في عقلك وارميه في الرمل.... وفعلا عملت كده.... حطت ايدها علي راس مراتي....وقالت... وقالت بحق العهود السبع والقرابين السبع وبحق الدم واللحم والعضم وبحق الملك بطرش اتوانا مسرعين مطيعين.... لقيت مراتي بتترعش وبتحاول تشيل ايد العرافه وصرخت... فتحت عينيها وقولتلها مالك.... ردت العرافه وقالت هيحصل المراد.... قولتلها بجد يا ست حوريه......قلتلي طبعا كله بأذنه احنا مجرد اسباب.... اخدت مراتي ورجعنا البيت.... كنت ملاحظ ان مراتي مسهمه ومش بتتكلم....
سألتها مالك... قلتلي انها تعبانه ومحتاجه انام.... وفعلا سبتها تنام... وانا كمان نمت صحيت علي صوت مراتي بتقول ابعد عني.... صحيتها وانا بقولها مالك.... كابوس شوفته تانى تاني... هو مين.. لما غمضت عينيا عند العرافه شوفته ودلوقتي شوفته..... هو مين.... كائن غريب طويل ضهره محني عضمه بارز منه عينيه بيضه وكان بيقرب مني وبيلمسني.. اهدي يا وفاء... انا هدخل الحمام قامت وانا بفكر في الي بيحصل.. لكن فجأه سمعت صرخه جايه من الحمام... جريت علي الحمام حاولت افتح الباب مره واتنين مفيش فايده... كسرت الباب وكانت الصدمه.......
الجزء التاني
مراتي واقعه جوه الحمام... وراسها مفتوحه جريت عليها شليتها وخرجتها بره الحمام... وفضلت افوق فيها وربطت دماغها بشاش ابيض.. فاقت وقلتلي هو اي الي حصل.. قولتلها انا سمعتك بتصرخي من الحمام.. فضلت اخبط واحاول افتح وفي الاخر كسرت الباب.... هو حصل اي جوه انتي شوفتي اي..... ردت عليا انا مش فاكره حاجه انا تعبانه وعاوزه ارتاح سبتها ترتاح شويه..... وبعد يومين قررنا نرجع القاهره من تاني سلمنا علي اهلي ومشينا ورجعنا بيتنا...
محصلش حاجه في الليله الي وصلنا فيها..... وتاني يوم نزلت شغلي وسبتها نايمه بعد ساعتين لقيتها بتتصل بيا وبتقولي عمرو انا عندي خبر هيفرحك انا حامل كلام الست طلع صح انا فرحانه اوي يا عمرو.... الف مبروك يا حببيتي ارتاحي ومتعمليش حاجه انا جيلك دلوقتي....قفلت معاها وكلمت اهلي وفرحتهم بالخبر ورغم فرحتي انا قلقان وخايف مش عارف ليه..... رجعت البيت وفتحت الباب البيت هادي جدا... نديت علي وفاء مش بترد.. دخلت الشقه بحذر لقيت وفاء واقعه في الصاله وفاقده الوعي....
فوقتها بسرعه وانا بقولها مالك انا مش قولتلك ارتاحي..... فضلت تعيط وتمسك في هدومي وتقولي المره دي مش حلم انا شوفته.. المره دي مش حلم انا شوفته.... اهدي يا وفاء وفهميني.. كانت منهاره لكنها بدأت تهدي بعد ما كلمتك قولت هدخل اخد دش.... دخلت الحمام بمجرد ما قفلت الباب نور الحمام بدأ يترعش.... وشوفت ستاره البانيو بتتهز وبتتحرك.. قربت منها وانا خايفه جمدت قلبي وفتحت الستارة لقيته في وشي نفس الكائن الي وصفتهولك حاولت اخرج من الحمام الباب كان مكلبش مش عاوز يتفتح وحسيت بنفسه في ضهري في اللحظة دي الباب اتفتح وخرجت اجري للصاله ومقدرتش اتحكم في نفسيوفقدت الوعي..انا قبل كده شوفته في كابوس بس المره دي كان حقيقه انا خايفه... طمنتها وقولتلها دي هلاوس بسبب الحمل....
بس انا نفسي مكنتش مطمن.... عدي كام يوم علي الموقف ده لحد لما حصلت اكتر حاجه مرعبه شوفتها في حياتي.... جارتنا في الدور الي فوقينا اسمها استاذه ماجده جات عشان تبارك لمراتي... رحبنا بيها ودخلت قعدت في الصالون ومراتي دخلت المطبخ تعملها حاجه تشربها.. طلعت من اوضتي لقيت استاذه ماجده بتقولي الولد الي في الاوضه دي شكله شقي اوي... رديت عليها وانا مصدوم ولد مين.... قلتلي في ولد هنا بيلعب في الاوضه... دخلت الاوضه بسرعه وفعلا في طفل صغير قاعد علي الارض ومديني ضهره انا اتجمدت في مكاني مين ده وبيعمل اي هنا.... قولتله انت مين واي الي جابك هنا...
اتلفتلي عينيه مكانه تجويف اسود فاضي وشه كان مسلوخ من عليه الجلد وكان بيخرج منه صوت فحيح مخيف.... اعوذ بالله من الشيطان الرجيم.. ربي اعوذ بك من همزات الشياطين واعوذ بك ربي ان يحضرون....... عمرو عمرو مالك واقف كده ليه... اتلفت ورايا لقيت وفاء بصيت تانى ملقتش حد الطفل او الشيطان اختفي.... فات اسبوع والدنيا بدأت تهدي تدريجي لكن واضح ان ده الهدوء الي بيسبق العاصفة.. كنت نايم لكني صحيت علي صوت صرخه شقت سكون الليل صرخه مراتي قومت ناطط من السرير مكنتش جمبي.. قومت ادور عليها في البيت كله وانادي عليها وفاء انتي فين....
باب الحمام كان موارب ونور الحمام كان بيرعش... قربت لقيت وفاء واقعه علي الارض لكنها مش فاقده الوعي كانت مبرقه وكأنها شافت شيطان اخدتها بره الحمام وفضلت اهز فيها عشان تفوق وسألتها مالك.. فاقت وقلتلي انا قلقت وقومت ادخل الحمام.. اول ما دخلت ووقفت قدام الحوض شوفت ست شكلها عجوز شايله طفل مشوه علي ايديها وقلتلي كلمه واحده بطرش.... نسيت اني في الحمام واستعذت بالله.. صرخات اخترقت عقلي في لحظه وحسيت بايد بتخنق فيا وبعدها مش فاكره حاجه.... طمنتها وقريت ليها قرآن لحد ما نامت..... الايام والشهور بتعدي وفات ٧شهور كانت بتحصل حاجات بسيطه معظمها كوابيس لكن الكابوس الي استوقفني لما مراتي وفاء حكتلي وقالت حلمت اني نايمه علي السرير وفي حواليا خمس ستات بيولدوني مغطيين وشهم بطرح سوده كنت بصرخ من الم الولاده لحد ما خلفت بس مكنش طفل كان شيطان عينيه عباره عن تجويف اسود وشه مسلوخ.. لما وفاء وصفت الطفل افتكرت الطفل الي شوفته في الاوضه.....
قولتلها ان ده مجرد كابوس بس رجعت قولتلها احنا غلطنا اننا رحنا للعرافه احنا من يوم مارحنلها وحياتنا اتقلبت... ردت عليا رد مستفز اومال كنت عاوزني اعيش من غير خلفه... اتعصبت لكن حاولت اهدي نفسي الجو مش ناقص توتر..... وفي يوم جالي تليفون من ابويا.. الو ايوه يا بابا اخبارك ايه... عمرو البقاء لله والدتك ماتت.... انت بتقول اي يا بابا ماما ماتت ماما.... فضلت ابكي زي الاطفال واقوله انت بتكدب عليا ماما عايشه.... اخدت مراتي ونزلنا البلد لسه مش مصدق انها ماتت... حزن كبير وذكريات مش يفهمني غير الي فقد امه... اتعمل عزا كبير لامي شعور من الامبالاه مسيطر عليا... وبعد ما العزا خلص كنت حابس نفسي في البيت مش بخرج.... لحد لما قررت اخرج واروح ازور قبرها قبر امي... خرجت واتمشيت في الشارع نظره التعاطف في عيون الناس واضحة من غير كلام.... لكن شوفت حاجه غريبه... مروه بنت الحج حسين الي حكت عنها امي انها قعدت عشر سنين من غير خلفه كانت لابسه جلبيه مقطعه وشعرها منكوش اشبه بالمجازيب....
الفضول دفعني اعرف ورحت زورت والدها الحج حسين.. رحب بيا وقلي البقاء لله يبني شد حيلك... الشده علي الله.... كنت عاوز اسألك علي حاجه... اسأل يبني... هو اي الي حصل لبنتك مروه.... الراجل زي ما يكون ركبه مليون عفريت وقلي انا معنديش بنات واتفضل مع السلامه... رديت عليه اهدي يا حج واحكيلي ارجوك انا لازم اعرف واطمن محدش هيعرف حاجه.... الراجل قعد علي الكرسي وخد نفس عميق واتكلم.... كلام الراجل كان بينزل عليا زي التلج وزود خوفي اكتر لانه قال....
الجزء الثالث والاخير
الراجل قال.. الجهل بيعمل كتير بنتي مكنتش بتخلف وقعدت علي الحال ده عشر سنين كامله لفينا علي دكاتره كتير والاجابه واحده بنتكم معندهاش اي مشكله ولا حتي الزوج.... نفسيه بنتي كانت بتتعب سنه ورا سنه وانا مكنتش عارف اعمل اي حتي عمليه الحقن المجهري عملتها وبرضو فشلت ودي حكمه ربنا في الاخر..... لحد لما جات البلد واحده غجريه اسمها حوريه كانت بتتكلم عربي كويس وعرفنا انها من المغرب وكان معاها ولد صغير وبنت في العشرين.... الست دي اجرت بيت وعاشت فيه وبعد شهر وبعد ما بدأت تاخد علي الناس والناس تاخد عليها عرفنا انها ليها في السحر وضرب الودع وهي ادعت انها بتحل المشاكل....
وطبعا يبني الجهل سائد ستات ورجاله كانوا بيروحلها الي عاوزه تخلف والي عايز يأذي حد وبقيت الست حوريه العرافه الي البلد كلها بتشكر فيها وبتتمنالها الرضا ترضي... لحد لما مروه بنتي طلبت انها عاوزه تروحلها وانه جايز حل المشكله تكون علي ايديها.... طبعا رفضت وقولتلها انتي ازاي تفكري كده احنا ناس متعلمه ومؤمنه.... لكن امها وافقت علي كلامها وحاولت تقنعني رفضت... لكن هما راحوا من ورايا ولما رجعوا زعقت معاهم وقولتلهم اننا كفرنا بربنا.... مراتي قلتلي حاجه خلتني اتأكدت ان الست دي كافره وملهاش مله.. قلتلي انها كانت واخده معاها مصحف اخدته منها ورمته.... بعد اسبوع بنتي حملت.. كنت شايف نظره الفرحه في عيون بنتي وده خلاني اسامحها علي الي عملته.... لكن بعد كام يوم اتصل بيا جوز بنتي وقلي بنتك بتقوم من النوم تصرخ وبتقول بتشوف كوابيس انا مش قادر استحمل توتر الاعصاب ده ومش عارف انام...
رحنا وزورناهم انا وامها.. بنتي اتكلمت وقالت انها بتشوف كوابيس وكانت بتقول الي في بطني ده مش ابني الي في بطني ده شيطان.... لحد لما جيه اليوم الاسود يوم الولاده... كل الي اقدر اقوله ان بنتي خلفت شيطان.... اعوذ بالله من المنظر الي شوفته مهما وصفت وحكيت منظره مقرف... بنتي لما شافت المنظر جالها حاله هيستريا وفضلت تصرخ وبعدين تضحك زي المجانين.... خرجتها بره الاوضه.. ورجعت عشان اشوف هتصرف ازاي مع الي جوه ده.... لكن لما دخلت كان الشيطان ده ملهوش اثر.... وبعد يومين البنت طفشت وخرجت الشارع زي ما انت شايف... حاولت كتير ارجعها البيت لكن معرفتش وبقيت مش عارف اوري وشي للناس.. انا خلاص هاخدها هي وامها وهسيب البلد دي.... خلص الراجل كلامه خوفي اتحول لرعب.. رجعت البيت وفي اليوم ده معرفتش انام من التفكير فضلت سهران لحد اذان الفجر واخدت قرار اني هروح للعرافه...
خرجت من البيت ورحت علي بيت حورية العرافه... دخلت البيت الي كان مضلم تماما... فضلت انادي عليها انتي فين يا حوريه... ردي عليا.... سمعت صوت جاي من اوضه في البيت... دخلت لقيتها قاعدة وسط دايره وقدامها صوره لطفل صغير وبترش حوالين الصورة تراب.... قولتلها كفايه اذيه في خلق الله انتي اي شيطانه انا جاي اعرف حاجه واحده الي في بطن مراتي ده ابني ولا لا... ولا كأني بتكلم... دخلت الدايرة وصرخت فيها ردي عليا الواد ده ابن مين.... وبرجلي شيلت صوره الطفل من قدامها.... صرخت وقلتلي ليه ليه..... وفي لحظه نار نار مسكت في كل ركن في البيت.. صرخات مدويه كأنها طالعه من الجحيم... خرجت اجري بره البيت وانا شايفوا بيتحرق...الناس مسكتني الي كانت بتصلي الفجر...
واتصلوا بالشرطه واتقبض عليا وابويا عرف الي حصل وزعل مني وقاطعني ورفض حتي يجيلي القسم..... اتهمت بقتل العرافه رغم انهم ملقيوش جثث في البيت.. اتعمل تحقيق كبير معايا وعن سبب زيارتي ليها في الوقت ده...رفضت احكي اي حاجه لكن شهادة الناس ان الست دي كانت دجاله ومع عدم وجود جثث افرجوا عني.... رجعت البيت وابويا طردني وقلي اني متصلش بيه تاني.. ولا ازوره..... رجعت القاهره انا ومراتي صحيح العرافه ماتت.. لكن لسه فيه طفل جاي انا خايف انه ميطلعش ابني..... كنت مش عايز يوم الولادة ده يجي لكنه جيه.... كنت واقف علي اعصابي قدام اوضه العمليات.. لحد ما خرج الدكتور وقال الف مبروك ولد يتربي في عزك... دخلت بسرعه بصيت على ابني زي القمر ماشاءالله.....
وبعد يومين خرجنا من المستشفى.. الحمدلله...... سميته يوسف كنت فرحان جدا اني اخيرا هسمع كلمه بابا..... وعدت فتره كبيره حياتنا بدأت تستقر نوعا ما... لحد ما في يوم لقيت تليفوني بيرن بصيت علي الشاشه.. كان بابا... الو ايوه يا بابا واحشني جدا.... عمرو الحقني يبني انا بموت.. الو بابا... الخط اتقطع.... اخدت مراتي وابني ورجعنا البلد.. وصلت البيت كان ابويا راقد في السرير وحالته صعبه جدا.... جبتله دكتور وقلي والدك محتاج يرتاح خليك جمبه.... حسيت اني عاوز اعمل حاجه معملتهاش من زمان... عاوز اصلي انا مقصر في حق ربنا.... خرجت ورحت الجامع وكانت صلاه العصر... خلصت صلاه وهخرج.. الشيخ لطفي شيخ الجامع نده عليا... رحتله.. نعم يا مولانا... اخبارك اي يبني واي الغيبة الطويلة دي...
معلش يا شيخنا مشاغل الدنيا... ابوك حكالي علي انت عملته ازاي يبني تسلم نفسك للشيطان يتحكم فيك.... قولتله غصب عني يا شيخنا انا خلاص توبت ورجعت لربنا واهي هي خدت الشر وراحت... قلي هي مين.... قولتله العرافه... قلي خدت الشر وراحت ازاي حورية العرافه عايشه يا عمرو هي صحيح اتشوهت لكن عايشه.... صدمه خلتني مش عارف انطق وقولتله عايشه ازاي دي اتحرقت قدام عينيا... ينهار اسود مراتي ابني ابويا.... خرجت اجري من الجامع رجعت البيت ملقتش مراتي... لقيت ابويا وابني بس.. ابويا قلي مراتك راحت المقابر تزور امها الله يرحمها.... سبته ورحت المقابر وصلت هناك كان الوقت داخل علي صلاه المغرب.... لقيت منعم التربي في وشي وبيقول اي الي جابك الترب في الوقت ده يا استاذ....
قولتله مراتي هنا في المقابر بتزور امها.... دلوقتي حد يجي دلوقتي تعالي نشوفها وفضلنا مشيين لحد لما وصلنا للقبر... التربي قال يا نهار اسود التربه مفتوحه... الدم نشف في عروقي مش عاوز اتخيل او اتوقع نورت كشاف الفون جوه.... اعوذ بالله... لا إله إلا الله مراتي كانت ميته وجوه القبر ازاي مش عارف... من الصدمه وقعت قدام القبر..... حزن جديد ذكريات كتير الدموع بتنزل من عينيا لوحدها... مش محتاج احكي التفاصيل دي دفنت مراتي ويا تري الدور علي مين......
خلص العزا وانا مش عارف اي هيحصل تاني... حبست نفسي في الاوضه وقررت اني خلاص هكتب كل حاجه انا خلاص عارف اني هموت ده مصيري وانا مسلم بيه واستاهل لاني مشيت ورا كفر ودجل.... خلصت الي بكتبه وحسيت بنفس في ضهري اتلفت ورايا وكانت الصدمه هيا حورية في اللحظة دي النور اتقطع.. كانت واقفه قدامي وشها المشوه في وشي.... انتي عاوزه مني اي مش كفايه الي راحوا.... لا مش كفايه انا عاوزه روحك هقتلك.... انا معملتش حاجه.... لا عملت هقولك علي حكايه قبل ما تموت.... انا كنت مسخره ملك من ملوك الجن لخدمتي كان اسمه بطرش...
وده جن مطرودمن قبيلته لانه متمرد... كان بيساعدني اتعلم السحر في مقابل قرابين اطفال وشباب.... ونسج اطفال بين الانس والجن.... قولتلها مش فاهم..... يعنى انا كنت بقدمله جثث اطفال وشباب... واي واحدة عاوزه تحمل كانت بتحمل بس من الجن.... لحد ما في يوم الجن طلب ابني مسعد قربان ابني كان طفل عنده ١١سنه... رفضت لكنه صمم... مكنتش عارفه اتصرف ازاي... قولتله اني هبطل الشغل ده ونقدت العهد الي بينا... غضب وحسيت بضعف في كل جسمي وقلي اني هندم..... عملت حاجه اسمها جلسه حمايه واستدعيت واحد من مرده الجن وكنت خلاص قربت اخلص لكن انت بغبائك بوظت الجلسه....
وخليت بطرش يعرف ينتقم مني.... وبعد الحريق باسبوع ابني اتصاب بمرض نادر ومات.... موت مراتك مش صدفه انا الي قتلتها ودلوقتي الدور عليك... وطبقت بايديها علي رقبتي... حسيت ان ايديها بتحرق رقبتي كأنها شعله نار..... افتكرت انه في مصحف جمبي علي الترابيزه... مسكته بصعوبه ورفعته في وشها.... صرخت وقولت بصوت خافت اعوذ بالله من همزات الشياطين واعوذ بك ربي ان يحضرون.. وقريت ايه الكرسي... وقعت في الارض وفضلت تتلوي وانا اعلي صوتي اكتر لحد ما ماتت..... رغم انها ماتت لكن كلامها يقلق يعني ده ابني ولا لا....
عدت ٣ سنين ومات والدي ورجعنا القاهره وعشنا حياه مستقره واتعلمت الدرس وانا الانسان يرضي بالي مقسملوا وبس........ لكن انا عاوز اضيف حاجه انا امبارح كنت نايم.. وصحيت لقيت يوسف واقف قدام السرير وبيقول بطرش بطرش
