سليلة الشيطان بقلم: أحمد محمود شرقاوي

 سليلة الشيطان بقلم: أحمد محمود شرقاوي

كنت واقفة على سطح البيت يومها حزينة على الحال اللي وصلت له من قلة التوفيق الغريبة اللي انا فيها في موضوع الجواز, انهاردة وبنفس الطريقة يعتذر العريس رقم 7 بدون أي أسباب بعد ما كان طاير من الفرحة وشايفني البنت اللي مفيش منها اتنين, وغصب عني بدأت أفتكر كل كلمة سمعتها في مناسبة قهرت قلبي وحتى لو كانت بهزار, لأن عندنا للأسف البنت اللي داخلة على التلاتين ولسة متجوزتش تعتبر معيوبة, رغم اني الوحيدة في أقراني اللي معايا شهادة عالية, وبشهادة الناس البنت الجميلة المهذبة المثقفة..

يعني المفترض الدنيا تمشي شوية عن كدا, بس نقول ايه غير ان ده أمر الله, ولا اعتراض على قضائه, بس دايما كنت بسمع كلمة ان معمولي سحر كتير أوي, وان اللي انا فيه ده استحالة يكون طبيعي, غصب عني دموعي نزلت من عنيا ورفعت ايدي للسما, مكنتش عارفة أقول ايه غير اني افتكرت اني من سنتين كانت ليا صديقة أبوها مديون بوصل أمانة وهيتحبس بعشرين الف, وبدون مقدمات طلعت العشرين الف تحويشة عمري وادتلها الفلوس, وابوها طلع من السجن وكانوا طايرين بيا من الفرح, ولحد دلوقتي بيسدوا فيهم ليا وانا سايباهم براحتهم لوجه الله خاصةً اني عارفة ان الحال عندهم صعب شويتين..

رفعت ايدي للسما وقتها وقلت:

"يارب بحق ما فعلت ابتغاء مرضاتك وفرجت كربة لأحدٍ من عبادك فرج كربي"

وبكيت, بكيت كتير أوي, وبعد نصف ساعة تقريبا سمعت صوت زعيق جاي من تحت, وبالأخص كان صوت مرات عمي, نزلت انا وأمي لقناها بتضرب بنتها الصغيرة بقسوة, استوعبناها وسألنا عن سبب ضربها للبنت فقالت ان البنت جابت قطة من الشارع وان القطة دي لازم تمشي بأي طريقة..

سألت ليلى بنت عمي بهدوء عن مكان القطة لقينا مرات عمي ماسكة قطة سودة زي ظلام الليل, سودة بطريقة غريبة, وعمالة تحلف لتموتها لو محدش مشاها من البيت لأنها مبتحبش القطط, كانت مسكاها بقسوة لدرجة اني قشعرت من قسوتها وخدت منها القطة وقولتلها:

- خلاص سيبيها انا هاخدها الشقة معايا

- يا بنتي القطط دي مؤذية بلاش

بصيت للقطة الصغيرة وحسيت اننا لو رميناها في الشارع كلاب القطط هينهشوا في لحمها, وقررت أخودها معايا الشقة فوق رغم تحذيرات مرات عمي وأمي اللي خدت من كلامها, وطلعت القطة الشقة وخلصت المشكلة, وقتها كانت الساعة داخلة في 9 بالليل ومكنتش بسهر الفترة دي ودخلت انام بدون أي مقدمات..

وفي نومي شوفت وكأن فيه أرنب من الأرانب اللي بنربيهم فوق على السطح واللي كنت بحبه جدا واقف في اوضتي وعمال يبص ناحيتي بحزن غريب, حسيت وكأنه كان طول الليل واقف الوقفة دي, وصحيت من نومي على ضوء الشمس اللي كان مالي الدنيا وانا مستغربة الحلم اللي شوفته ده..

جهزت أكل الأرانب والفراخ وخبطت على مرات عمي عشان تجهز أكل الطيور بتاعتها وطلعت, كان مشروع كويس جدا بصراحة, عملنا حوالي أربع عشش فوق من الخشب وحطينا في كل عشة حاجة, هنا فراخ, وهنا بط, وهنا أرانب, والعشة الأخيرة كانت بتاعت مرات عمي كانت فيها أرانب..

خدت الأكل وبدأت افتح العشش عشان الطيور تخرج وتاكل, ومسافة ما فتحت عشة الأرانب شوفت اللي خلاني أصرخ بأعلى صوت, الأرانب كلها كانت ميتة ومنهوشة بطريقة مخيفة, كأن حيوان شرس دخل قتلهم كلهم, ناديت أمي ومرات عمي بسرعة وابويا وعمي وطلعنا عشان نشوف الكارثة دي, عشة كاملة فيها حوالي 30 أرنب أموات, أمي قلبها وجعها من الحسرة وابويا فضل يخبط كف على كف, ازاي اللي دخل قتلهم دخل بالسهولة دي..

بل وايه الحيوان اللي يقدر يقتل 30 أرنب ويقدر يوصل سطح البيت بالسهولة دي ؟؟!!

وخدنا الأرانب في شوال كبير عشان ابويا يرميهم واحنا في قمة الحسرة والزعل, خرج ابويا وعمي اتخلصوا منهم ورجعوا قفلوا كل العشش كويس أوي عشان الموضوع ميتكررش, يومها كنت حاسة بوجع شديد في قلبي, خاصةً ان روحي كانت في الأرانب دي, وتعبت أكتر لما افتكرت الحلم اللي شوفته, وكأن الأرنب كان بيودعني قبل ما يموت..

ونزلت الشقة لقيت القطة بتاكل من الأكل اللي انا حطاه وعمالة تلعق جسمها, طبطبت عليها وبعدها دخلت اوضتي لحد بالليل وانا مش عارفة أخرج منها من الزعل, وعلى بالليل ومن الزعل قررت أطلع على السطح من تاني بعد ما فضلت للساعة 12 بالليل مش عارفة أنام..

طلعت فوق ووقفت شوية على السطح وفضلت العب في الموبايل, ووسط سرحاني سمعت صوت غريب جاي من قدام العشة بتاعت الفراخ اللي في آخر السطح, المكان كان ضلمة بس حاولت بقدر الإمكان أركز عشان أشوف ده ايه, وهناك وقدام العشة كان فيه حاجة ضخمة واقفة, حاجة عيونها حمرة زي لون الدم, وواقفة بتبص ناحيتي بشراسة غريبة..

اتجمدت مكاني وحسيت ان جسمي كله بينهار من الفزع, وبكل رعب الدنيا صرخت, ومسافة ما صرخت لقيت مرات عمي طلعت تجري وكأنها كانت على السلم وفضل تسأل بخوف عن سبب صراخي, في الوقت ده العين اختفت تماما..

وقعت في الأرض وفضلت اترعش بين ايديها كتير أوي, في النهاية طمنتني ان مفيش حاجة, وعرفت انها كانت طالعة زيي تطمن على الطيور بسبب اللي حصل, حمدت ربنا انها جت في الوقت المناسب, خدتني على تحت ودخلت نمت فورا..

وتاني يوم كانت فيه مفاجأة جديدة أشد سوء, عشة الفراخ كانت كلها جثث, الفراخ كلها ماتت بنفس الطريقة اللي ماتت بيها الأرانب, واتكرر نفس المشهد, واتحسرنا عليهم حسرة الدنيا, فلوس ومجهود ووقت, كله راح في الأرض, ونزلنا واحنا في قمة الحزن والحسرة..

ومفيش دقايق وسمعت أمي بتصرخ وصوت خبطة عنيفة, جريت على اوضتهم لقيت مروحة السقف وقعت على ابويا بس سبحان من خلاها تقع على كتفه بس مش راسه وإلا كانت قتلته..

وخدناه على المستشفى واتجبس, وفي نفس اليوم بالليل دراع أمي اتشوه وهي بتحمر البطاطس بالزيت, ابويا وقتها ثار, فضل يقول وكأن فيه لعنة ماسكة البيت كله, أمي فضلت تتألم بطريقة غريبة لحد ما جبنا دكتور وكتبلها على مرهم للحروق وفين وفين لما ارتاحت ونامت, وقتها كنت في أشد أنواع الضيق, دخلت وقعدت على سريري وانا حاسة ان فيه جبل محطوط على صدري..

طفيت النور وحاولت أنام بأي طريقة, وفعلا في النهاية قدرت أنام, بس في نص الليل صحيت على صوت حد بيتنفس بصوت خشن أوي, فقت من النوم وانا قلبي بيدق بعنف شديد, كان الصوت جاي من طرف السرير هناك, مسكت الموبايل وانا ايدي بتترعش ووجهت الضوء على مكان الصوت...

واتشليت, اتشليت من الفزع, كنت شايفة القطة السودة, كانت واقف بتبص ناحيتي وعنيها جاحظة بطريقة مفزعة, وكانت مبتسمة, مبتسمة كأنها انسان, شهقت مرة واتنين ولساني كان وكأنه مش موجود, صوتي مبيخرجش, جسمي مبيتحركش..

وسمعتها, سمعتها بتتكلم وبتقول بصوت قاسي وكأنه جاي من حنجرة وحش اسطوري:

"الخراب"

ووقعت في غيبوبة عميقة, مكنتش هتحمل كلمة تانية اطلاقا, وفضلت لحد الصبح في الغيبوبة, ولما صحيت قلبت البيت كله على القطة اني الاقيها ملقتهاش اطلاقًأ, لدرجة اني حمدت ربنا انها مشيت, وقبل ما اتحرك سمعت صوت حسبنة ابويا من برة, خرجت بسرعة لقيت شاشة التلفزيون مكسورة ومحدش عارف وقعت ازاي من مكانها, أمي فضلت تبكي بسبب الخراب اللي نزل علينا, وابويا قعد على الأرض مبينطقش..

دخلت يومها أبكي من الحال الغريب اللي وصلنا له, ورجعت أدعي من تاني ربنا يرفع عنا أي كرب بحق العمل اللي عملته لوجهه الكريم, كنت كالعادة مكاني على السطح, وفضلت مكاني لحد قبل المغرب بدعي, ومع غروب الشمس وقبل ما انزل سمعت صوت وشوشة غريبة..

كان فيه بيت قديم لازق في بيتنا ولو نطيت من على السطح بتاعنا هتوصله بسهولة, روحت ناحية السور اللي بيني وبينه وبصيت ناحية صوت الوشوشة, ومن خلال فتحة شباك في البيت ده لمحت مرات عمي, ايوة مرات عمي, ايه اللي وداها في البيت القديم ده, وقدام عنيا المذهولة شوفت القط واقف قدامها على رجلين زي البشر وهي بتترعش وبتتكلم معاه بكل خشوع..

شعر راسي كله وقف خاصةً ان الكلام كان بيوصلني لأن المكان كان هادي..

"عايزة البيت كله يتحرق, يخرب, عاوزة خراب على الكل"

"اسجدي يا بنت آدم"

وقدام عنيا شوفتها بتسجد, مسكت موبايلي وانا ميتة من الرعب وصورت كل ده, ونزلت بسرعة ناديت ابويا وعمي وورتهم الفيديو, في الوقت ده كانت مرات عمي رجعت السطح بتاعنا ونزلت الشقة, وكان الذهول سيد الموقف, عمي واجهها قدامنا وطلب يعرف هي كانت هناك في البيت بتعمل ايه..

وبتسجد قدام القط ليه, وقفت قدامنا تترعش وفضلت تتكلم بكلام مش مفهوم, وقتها أقسم ليقتلها لو مقالتش, وانا واجهتها انها أكيد عملت حاجة لأني سمعتها بتقول الخراب لبيتنا كله, ولما متكلمتش عمي نزل بالعصاية عليها لحد ما فضلت تصرخ وتستغيث ومسبهاش غير وهي بتقول كل حاجة..

مرات عمي عملت سحر بتعطيل الحال ليا ودفنته في البيت القديم ده.

مرات عمي عملت سحر لأمي بالمرض ودفنته في البيت ده..

مرات عمي عملت سحر تالت لابويا بالتفريق ودفنته في البيت ده..

ولما الاسحار مجابتش نتيجة عملت سحر خبيث عند ساحر على حيوان, القط, وعملت تمثلية ان بنتها اللي جابته وضربت القط قدامنا عشان عارفة ان قلبي طيب وهاخده منها, والسحر ده بيخلي جسم الحيوان يتلبس بجن, وهي اللي كانت بتطلع بالليل تسيب العشش مفتوحة عشان القط يدخل يقتل الحيوانات بتاعتنا احنا وبس وبعدين تقفلها, ووجود القط ده كان هيسبب في خراب البيت في أسرع وقت..

ببساطة مسابتش حاجة غير وعملتها, وكل ده عشان بتحقد علينا عشان انا معايا كلية وابويا مرتاح ماديا عن عمي, يومها عمي خدها من شعرها وطلعنا من البيت يجي ست أسحار معمولين لينا وودناهم لشيخ يفكهم وراح مطلقها بالتلاتة..

وخدت حاجتها ومشيت وامي فضلت تتحسبن فيها لأكتر من خمسين مرة, شيطان كان عايش معانا ربنا ينتقم منها, حمدت ربنا انه استجاب بفضل دعواتي بالخير اللي عملته وكشفلنا الحقيقة..

وبعد تلت أيام سمعنا ان مرات عمي عملت حادثة وحصلها بتر كامل في رجليها الاتنين, وكأن السحر انقلب على الساحر, أو يمكن ربك كان ليها بالمرصاد، وبقيت على يقين ان طريق الشر نهايته عذاب في الدنيا وفي الآخرة، وان المعروف في الناس بيترد بمعروف أكبر من رب العالمين سواء في الدنيا أو في الآخرة..

"وأنه كان رجال من الإنس يعوذون برجال من الجن فزادوهم رهقا"